FLASH
Shkruar nga Pamfleti
Pas “shfajësimit” që Polica i bëri vetes lidhur me rastin, radha i kaloi Gjykatës së Korçës, e cila me anë të një reagimi zyrtar ka deklaruar se ka qenë institucioni i akuzës që ka kualifikuar veprën si “vrasje nga pakujdesia”, duke ja hedhur topin kështu Prokurorisë.
Çështje e vrasjes së Eglantin Progës në Pogradec pak ditë më parë nga i dyshuari Denis Meçe, vijon të krijojë një kaos informativ lidhur me veprimet e institucioneve përkatëse lidhur me procedimin e kësaj çështje.
Pas “shfajësimit” që Polica i bëri vetes lidhur me rastin, radha i kaloi Gjykatës së Korçës, e cila me anë të një reagimi zyrtar ka deklaruar se ka qenë institucioni i akuzës që ka kualifikuar veprën si “vrasje nga pakujdesia”, duke ja hedhur topin kështu Prokurorisë. Më tej gjykata argumenton se pranoi kërkesën e akuzës me idenë se ajo është e bazuar në fakte ligjore dhe prova.
“Pasi ka vlerësuar kërkesën e prokurorisë dhe përmbajtjen e akteve të veprimeve hetimore të kryera deri në këtë fazë të hetimit, gjykata ka vendosur pranimin e kërkesës, duke e vlerësuar atë si të bazuar në ligj dhe në prova”, thuhet në reagimin e gjykatës.
Më tej Gjykata shton se në këtë fazë ku ndodhen hetimet, gjyqtari nuk mund të kërkojë ndryshimin e cilësimit juridik të veprës penale për të cilën procedohet personi nën hetim dhe as të caktojë një masë sigurimi më të rëndë se ajo e kërkuar.
Kujtojmë se Inspektori i Lartë i Drejtësisë deklaroi se ka nisur verifikimet në adresë të gjyqtares dhe prokurorisë së Korçës që hetuan Denis Meçen. Ajo kërkon që të zbardhet se si u ndryshua akuza nga “vrasje me dashje” në “vrasje nga pakujdesia”.
Reagimi i Gjykatës së Korçës:
Gjykata e Shkallës së Parë të Juridiksionit të Përgjithshëm Korçë, nisur nga rëndësia e ngjarjes dhe duke marrë shkas nga publikimet në median e shkruar dhe atë vizive, si dhe nga lajmet e publikuara në rrjetet sociale dhe portale të ndryshme për ngjarjen e ndodhur në qytetin e Pogradecit, në të cilën ka humbur jetën shtetasi Eglantin Proga, bën me dije sa më poshtë:
Në datë 12 gusht 2024, ora 15:30, nga ana e Prokurorisë pranë Gjykatës së Shkallës së Parë të Juridiksionit të Përgjithshëm Korçë është paraqitur pranë kësaj gjykate kërkesa për vleftësimin e arrestit në flagrancë dhe caktimin e masës së sigurimit personal “arrest në burg” ndaj shtetasit D. M, si i dyshuar për kryerjen e veprës penale “Vrasja nga pakujdesia”, parashikuar nga neni 85 i Kodit Penal dhe vleftësimin e arrestit në flagrancë dhe caktimin e masës së sigurimit personal “Detyrimi për tu paraqitur në policinë gjyqësore” ndaj shtetasve V. Sh, A. M dhe L.G si të dyshuar për veprën penale “Moskallëzimi i krimit”, parashikuar nga 300 i Kodit Penal.
Pasi ka vlerësuar kërkesën e prokurorisë dhe përmbajtjen e akteve të veprimeve hetimore të kryera deri në këtë fazë të hetimit, gjykata ka vendosur pranimin e kërkesës, duke e vlerësuar atë si të bazuar në ligj dhe në prova.
Gjykata e Shkallës së Parë të Juridiksionit të Përgjithshëm Korçë nënvizon se në këtë fazë të procesit penal, në shqyrtimin e kërkesave për caktimin e masave të sigurimit personal, gjyqtari i hetimeve paraprake nuk mund të bëjë ndryshimin e cilësimit juridik të veprës penale për të cilën procedohet personi nën hetim dhe as të caktojë një masë sigurimi më të rëndë se ajo e kërkuar.
Përcaktimi i plotë dhe saktë i rrethanave të faktit dhe përgjegjësisë penale të secilit person të përfshirë, i takon vijimit të hetimeve. Në përfundim të hetimeve, është gjyqtari i seancës paraprake i cili vlerëson plotësinë e tyre dhe cilësimin juridik të veprës penale.
Për këtë arsye, nxjerrja e përfundimeve në këtë fazë fillestare të hetimeve, nuk i shërben vijimit të tyre dhe as besimit të opinionit publik mbi punën organeve të sistemit të drejtësisë.
Nga ana tjetër, Gjykata e Shkallës së Parë të Juridiksionit të Përgjithshëm Korçë vëren me shqetësim disa artikuj të publikuar në media, të cilat synojnë apo tentojnë të denigrojnë figurën e gjyqtarit të çështjes, duke ritheksuar zbatimin e ligjit me korrektësi dhe saktësi maksimale në çdo rast
Lini një Përgjigje