FLASH
Shkruar nga Pamfleti
Kryeministri Edi Rama dëshmoi sot se ka filluar të trembet nga SPAK. Teksa reagimet për Veliajn shiheshin si retorikë politike, sot pati një reagim skandaloz nga ana e tij. SPAK zhvilloi një aksion te Universiteti Bujqësor, duke vënë në masë sigurie 24 persona për abuzime me tenderët.
Kryeministri reagoi me urgjencë dhe madje nesër rektori i UBT do të dalë para grupit të PS për të dhënë sqarime, një skandal më vete ky.
“Nesër në 09.00 Grupi Parlamentar i shumicës qeverisëse do të dëgjojë me kërkesën e tij, Rektorin e Universitetit Bujqësor, Fatbardh Sallaku, lidhur me 24 masa sigurie PA GJYQ për stafin dhe pedagogët e universitetit për disa procedura të disa viteve me parë në shumën totale më pak se 30 milionë lekë! Vetë rektori, i cili nuk rezulton i lidhur me këtë hetim, flet për një keqkuptim shumë të madh dhe kërkon të dëgjohet publikisht, në një moment historik kthese për Universitetin Bujqësor që ka hyrë në rrugën e transformimit me synim njehsimin e plotë të diplomave me Universitetin BOKU të Vjenës në Shqipërinë2030”, shkruan Rama.
Mirëpo SPAK në një reagim publik sot, përveçse ka deklaruar se ata kanë prova e fakte, i dërgon dhe një mesazh kryeministrit. Sipas SPAK, hetimet për këtë rast i ka nisur Policia e Shtetit.
“Hetimet në kuadër të këtij procedimi penal vazhdojnë për fakte penale dhe veprime të kundraligjëshme të personave të tjerë. Falenderojmë Drejtorinë e Përgjithshme të Policisë së Shtetit për hetimet paraprake të zhvilluara dhe ekzekutimin e masave të sigurimit”, përfundon SPAK.
Lini një Përgjigje