FLASH
Shkruar nga Pamfleti
Media serbe shprehet se është një rrjet spiunësh që punon për Shërbimin Informativ Shqiptar...
Deri dje Rama e Vuçiç konsideroheshin “vëllezër”, por duket se buka është thyer dhe tani ka nisur një tjetër betejë Shqipëri-Serbi, ajo e spiunazhit.
Media e njohur pro qeveritare serbe “Novosti”, shkruan se autoritetet vendase kanë ndaluar një shtetas serb, pasi e akuzojnë si spiun të Shërbimit Informativ Shqiptar.
Bëhet fjalë për një ekspert IT, të cilit i është gjetur një kamera, me të cilën pretendohet se ka filmuar të dhëna sensitive dhe ja ka dërguar Shërbimit Shqiptar.
“Një shtetas i Serbisë, i cili është ekspert i IT-së, është arrestuar nën dyshimin se ka kryer veprën penale të spiunazhit. Që nga viti 2022, DR me një rrjet bashkëpunëtorësh të tij, për Shërbimin Informativ Shtetëror të Shqipërisë, SHISH, ka mbledhur të dhëna për anëtarët individualë të Shërbimeve të Sigurimit të Serbisë dhe serbët nga Kosova e Metohije”, shkruan media serbe.
Në shkrim pretendon se ai është takuar me përfaqësues të SHISH-it kryesisht në Maqedoninë e Veriut dhe në Shqipëri, e disa herë edhe në Pejë.
Po ashtu ka folur edhe presidenti Vuçiç, i cili ka thënë se Agjencia për Sigurinë dhe Informacionin BIA do të vazhdojë të bëjë punën e saj dhe nuk ka dyshim se në territorin e Serbisë është rritur ndikimi dhe prania e agjencive të ndryshme të inteligjencës dhe të të gjitha agjencive të tjera nga jashtë.
Vuçiç tha se ka marrë një raport disi më të gjerë dhe se kjo është një punë për BIA-n, por se nuk ka dyshim se prania e agjencive të inteligjencës është shtuar "për arsye të kuptueshme".
“Vendi ynë është një vend që nuk futet në kallëpet e bindjes dhe nënshtrimit, vendi ynë është i lirë dhe liridashës, vendi ynë është i pavarur dhe vendi ynë merr vendime në përputhje me interesat e popullit tonë dhe qytetarëve tanë, dhe jo në përputhje me diktatet e marra nga kushdo nga jashtë”, theksoi Vuçiç.
Lini një Përgjigje