FLASH
Shkruar nga Pamfleti
OpenAI do të lejojë ChatGPT të gjenerojë përmbajtje erotike me tekst nga muaji dhjetor, por vetëm për përdorues të rritur dhe të verifikuar. Lajmi u bë i ditur nga vetë themeluesi i kompanisë, Sam Altman, i cili deklaroi në rrjetin X se kjo lëvizje është pjesë e filozofisë “të trajtojmë të rriturit si të rritur”.
Megjithëse për momentin kufizohet vetëm në përmbajtje të shkruar, kjo është hera e parë që një chatbot me përmasa globale si ChatGPT hyn në territorin e erotikës. Modele të tjera të mëdha si Claude, Gemini dhe Perplexity vijojnë të refuzojnë prodhimin e çdo materiali seksual, pavarësisht kërkesave në rritje.
Ekspertët e etikës në teknologji, si Sven Nyholm, thonë se kjo ishte vetëm çështje kohe. “Në Silicon Valley ekziston bindja se çdo problem mund të zgjidhet me teknologji”, thotë ai, duke kujtuar edhe sugjerimet e Mark Zuckerberg për përdorimin e chatbotëve për të luftuar “epideminë e vetmisë”.
Shoqata të vogla si Replika e kanë testuar më parë këtë territor, duke ofruar “partnerë virtualë” me pagesë. Por futja e një gjiganti si OpenAI ndryshon krejt natyrën e tregut.
Pasojat dhe shqetësimet
Shoqata për të Drejtat e Njeriut dhe specialistë të AI kanë ngritur alarmin se kjo risi mund të ketë pasoja serioze. “Çfarë ndodh kur këta ‘seksbotë’ përdoren nga persona të brishtë emocionalisht?”, pyet Kate Devlin, studiuese në King’s College London.
Vetë OpenAI është përballur me kritika të ashpra kohët e fundit. Në një rast tragjik, një adoleshent kreu vetëvrasje pas bisedave me ChatGPT që thuhet se nxitën mendimet e tij vetëvrasëse. Në një tjetër rast, një kanadez 47-vjeçar u bind se ishte “gjeni i dërguar për të shpëtuar njerëzimin”, pas vetëm tre javësh ndërveprim me chatbot-in.
Simon Thorne, ekspert i AI në Universitetin e Cardiff-it, thekson rrezikun e “jailbreaking”, ku përdoruesit manipulojnë chatbotët për të gjeneruar përmbajtje të ndaluara. “Në këtë kontekst, edhe erotika mund të degjenerojë në përmbajtje problematike ose të paligjshme”, shton ai.
Kontrolli dhe censura
Në SHBA, klima politike po bëhet gjithnjë e më konservatore, veçanërisht kundër të drejtave të grave dhe komunitetit LGBT. Devlin paralajmëron se OpenAI mund të censurojë përmbajtjen erotike për t’iu përshtatur këtij konteksti.
“Çfarë ndodh nëse ChatGPT nis të ‘besojë’ se marrëdhëniet e së njëjtës gjini nuk janë të pranueshme, dhe e transmeton këtë mesazh te përdoruesit e rinj?”, pyet Thorne, duke theksuar rrezikun e ndikimit afatgjatë te gjeneratat që rriten me këtë teknologji.
Ekspertët bien dakord se një platformë private si OpenAI nuk mund të bëjë rolin e cenzorit global për përmbajtjen seksuale. Ndërkohë, mënyra se si do të monetizohet kjo risi mbetet e paqartë, por një model “premium” me pagesë për përmbajtje më eksplicite është ndër opsionet më të përfolura.
Lini një Përgjigje