FLASH
Shkruar nga Pamfleti
Ministri i Punëve të Brendshme të Kosovës, Xhelal Sveçla, në një konferencë për mediat së bashku me drejtorin e Policisë, Gazmend Hoxha, kanë prezantuar detaje të reja tronditëse të cilat vërtetojnë përfshirje e drejtpërdrejtë të Serbisë në sulmin në Banjskë.
Sveçla tha se përmes pamjeve të siguruara nga dronët e grupit terrorist të cilët u konfiskuan, vërtetohet se përgatitjet për sulm u bënë në Serbi dhe se i përfshirë është dhe presidenti serb, Aleksandër Vuçiç.
“Sot do të shohim në detaje me pamje jo vetëm sulmin terrorist në Banjskë por edhe përgatitjet e këtij grupi në qendrat e trajnimit të Serbisë. Në këtë trajnim janë angazhuar, presidenti serb, Aleksandar Vuçiçi, ministri i Mbrojtjes së Serbisë, Milosh Vuçeviç dhe shefi i komandës së ushtrisë, Milan Mojsiloviç. Vuçiçi është munduar ta fshehë faktin se Serbia është angazhuar në organizimin e këtij sulmi”, tha Sveçla.
Ndërsa drejtori i Përgjithshëm i Policisë së Kosovës, Gazmend Hoxha, tha se nga hetimet e bëra kanë ardhur në përfundim se grupi terrorist që sulmoi Policinë e Kosovës në Banjskë më 24 shtator, është stërvitur për një kohë të gjatë në territorin e Serbisë.
Hoxha shtoi se grupi ishte stërvitur në hapësirën e Hotel Grey në Kopaonik, që është pronë e Milan Radoiçiçit, ndërsa po ashtu është stërvitur edhe në poligonin më të madh ushtarak në Serbi në “Pasuljanske Livade”.
Sipas tij Serbia u ka vënë në dispozicion grupit logjistikën e infrasatrukturën për stërvitje, teksa shtoi pamjet e reja janë siguruar nga dronët e grupit që janë konfiskuar.
“Bazuar në të dhënat e siguruara, rezulton se qendra e grupit terrorist ishte Kopaoniku, përkatësisht hapësira që është pronë e Milan Radoiçiçit. Ushtrimet ushtarake janë mbajtur në një prej poligonet më të mëdha ushtarake të Serbisë, së paku 4 ditë para sulmit në Banjskë”, ka thënë Hoxha në konferencë për media.
Drejtori i Përgjithshëm i Policisë së Kosovës, gjithashtu ka shfaqur në konferencë për media foto të armëve të ndryshme që janë gjetur sërish në vende të ndryshme në Banjskë të Zveçanit.
“Këto janë pajisje ushtarake të gjetura, është minë e përdorur me teledirigjim në sulmin ndaj kolegëve tanë, me çrast humbi jetën rreshteri policor Afrim Bunjaku nga sulmi i parë me detonim nga kjo lloj mine”, tha Hoxha.
Hoxha deklaroi se shumë nga armët e gjetura janë prodhim i ri i Serbisë dhe se nuk mund të gjenden në treg të zi./Pamfleti
Lini një Përgjigje