FLASH
Shkruar nga Pamfleti
Këshilltari i ri i Sigurisë Kombëtare i Suedisë, Tobias Thyberg, dha dorëheqjen më pak se 24 orë pas emërimit të tij të enjten, pas shfaqjes së fotove “sensitive” të lidhura me një profil të vjetër në aplikacionin e takimeve.
“Menjëherë pas vendimit të qeverisë dje për të emëruar Tobias Thyberg, dolën informacione krejtësisht të reja personale rreth tij, të cilat më parë nuk ishin të njohura për Zyrat e Qeverisë”, tha për POLITICO në një deklaratë Johan Stuart, Sekretari i Shtetit i Kryeministrit suedez Ulf Kristersson.
Stuart shpjegoi se Thyberg pranoi të enjten në mbrëmje se nuk kishte zbuluar informacione gjatë procesit të rekrutimit që ishte i detyruar t’i ndante.
“Kjo është, sigurisht, serioze. Prandaj, ai ka vendosur vetë të mos e marrë këtë pozicion. Tani do të fillojë një proces i ri rekrutimi”, tha Stuart, duke shtuar se Zëvendës Këshilltarja e Sigurisë Kombëtare Annika Brändström do të shërbejë në këtë rol përkohësisht.
Më herët të premten, gazeta suedeze Dagens Nyheter (DN) raportoi se Thyberg dha dorëheqjen pasi media e kishte pyetur në lidhje me fotot e përshkruara si “të ndjeshme”.
“Këto janë fotografi të vjetra nga një llogari që kisha pasur më parë në faqen e takimeve Grindr. Duhet ta kisha informuar [qeverinë] për këtë, por nuk e bëra. Prandaj kam thënë se nuk kam ndërmend të marr pozicionin e këshilltarit të sigurisë kombëtare”, tha Thyberg për DN.
Thyberg shërbeu si ambasador i Suedisë në Afganistan nga viti 2017 deri në vitin 2019, ambasador në Ukrainë deri në vitin 2023 dhe së fundmi drejtoi njësinë e ministrisë së jashtme për Evropën Lindore dhe Azinë Qendrore.
Suedia ka pasur vetëm dy këshilltarë të sigurisë kombëtare deri më sot, të dy prej të cilëve janë larguar nga posti në rrethana të pazakonta. Paraardhësi i Thybergut, Henrik Landerholm, dha dorëheqjen në janar pasi një prokuror nisi një hetim për keqpërdorimin e tij të dokumenteve shumë të klasifikuara në një qendër konferencash në vitin 2023.
Lini një Përgjigje