FLASH
Shkruar nga Pamfleti
Kryeministri polak Donald Tusk ka akuzuar Rusinë se po planifikon akte sabotazhi në mbarë botën, mes tyre "akte terroriste" kundër linjave ajrore.
Në një konferencë të përbashkët shtypi me presidentin ukrainas Volodymr Zelenskyy, Tusk tha se Putin po planifikon sulme.
“Nuk do hyj në detaje, por mund të konfirmoj se ekziston frika se Rusia po planifikon akte terrori kundër linjave ajrore, jo vetëm kundër Polonisë, por në mbarë botën”, u shpreh ai.
Kremlini ka hedhur poshtë pretendimet e mëparshme perëndimore se Rusia ka paguar për akte sabotazhi dhe sulme në Evropë.
Zyrtarët perëndimorë të sigurisë dyshojnë se zbulimi rus qëndron pas disa komplotesh duke vendosur pajisje shpërthyese në aeroplanë që tranportonin mallra e produkte, e që fluturonin drejt Amerikës së Veriut. Mes tyre dy aeroplanë që morën flakë vitin e kaluar në Gjermani dhe Angli, ndërsa po ngarkonin pako për transport.
Qeveria e Varshavës, me qasje pro Bashkimit Evropian, thotë se Rusia po kryen akte të luftës hibride kundër Polonisë dhe vendeve të tjera perëndimore si hakmarrje për mbështetjen që ato po i japin Ukrainës, në luftën e saj kundër agresionit rus.
Polonia ka akuzuar Rusinë dhe aleatin e saj Bjellorusinë, për nxitje të një krize emigracioni në kufirin lindor të BE-së me Bjellorusinë, në mënyrë që të krijojë kaos dhe përçarje në Evropë.
Vitin e kaluar, ministri i jashtëm i Polonisë urdhëroi mbylljen e një prej tre konsullatave ruse në këtë vend, si përgjigje ndaj akteve të sabotazhit, që përfshinin ndër të tjera, zjarrvënie të qëllimta, që siç tha ai, ishin porositur nga Moska./VOA
Lini një Përgjigje