FLASH
Shkruar nga Pamfleti
Sekretari i përgjithshëm i NATO-s, Jens Stoltenberg, ka përgënjeshtruar presidentin francez Emmanuel Macron në lidhje me dërgimin e trupave në Ukrainë.
Ai tha për "Associated Press" se aleanca ushtarake nuk ka plane të ndërmarrë një hap të tillë.
“Aleatët e NATO-s po ofrojnë mbështetje të paprecedentë për Ukrainën. Ne e kemi bërë këtë që nga viti 2014 dhe jemi rritur pas pushtimit në shkallë të gjerë. Por nuk ka plane për trupat luftarake të NATO-s në terren në Ukrainë”, tha Stoltenberg.
Ditën e djeshme, zyrtarë të lartë nga 20 vende të botës diskutuan opsionet për të rritur ndihmën për Ukrainën.
Kryeministri i Sllovakisë, Robert Fico u shpreh se po mendohet nëse do të arrihet një marrëveshje për të dërguar trupa në Ukrainë për ta ndihmuar të përballojë pushtimin rus.
Ai tha se qeveria e tij nuk po planifikon të propozojë dërgimin e ushtarëve sllovakë, por nuk dha detaje se cilat vende mund të konsiderojnë marrëveshje të tilla, apo çfarë do të bëjnë trupat në Ukrainë.
Kujtojmë se presidenti i Francës Emmanuel Macron, tha ditën e djeshme se refuzoi të përjashtonte dërgimin e trupave tokësore në Ukrainë, megjithëse theksoi se nuk ekzistonte konsensus për këtë hap.
Lini një Përgjigje