FLASH
Shkruar nga Pamfleti
Pse ekuipazhi shpëtoi veten duke hipur në varkën e shpëtimit, ndërsa të tjerët ishin brenda dhomave në jaht?!
Autoritetet italiane kanë nisur hetimet për vrasje nga pakujdesia, pas fundosje së jahtit luksoz në brigjet e Siçilisë, ku humbën jetën tragjikisht 7 persona, mes tyre edhe manjati britanik i teknologjisë, Mike Lynch.
Kryeprokurori italian në një konference për shtyp sqaroi se prokuroria është duke hetuar aktualisht mbi një “hipotezë krimi” për vrasje nga pakujdesia, megjithëse momentalisht nuk është marrë askush nën hetim.
Ai deklaroi se hulumtimet janë ende në fazë të hershme dhe nuk tregojnë asgjë në këtë pikë të hetimeve.
Prokurori ngre pyetjen se pse ekuipazhi shpëtoi veten duke hipur në varkën e shpëtimit, ndërsa të tjerët ishin brenda dhomave në jaht?!
“Një tragjedi e rëndë. Për momentin kemi nisur hetimet ndaj personave të panjohur për mbytjen e anijes nga pakujdesia dhe vrasje nga pakujdesia.
Atë natë ishte planifikuar dhe roja në urë ishte në detyrë. Pyes veten pse ai nuk e pa stuhinë që po vinte?! Po hetojmë gjithashtu pse ekuipazhi shpëtoi veten duke hipur në varkën e shpëtimit, ndërsa të tjerët ishin brenda dhomave në jaht?! Ajo që dimë është se ngjarja ishte vërtet e papritur dhe ka të panjohura. Viktimat mbetën pas, në anijen me vela, sepse ishin duke fjetur. Ne po mundohemi ta konstatojmë këtë duke kryqëzuar dëshmitë dhe duke kontrolluar atë që del, kjo është një pikë kulminante e hetimeve”, tha prokurori Cammarano.
Vajza 18-vjeçare e Lynch, Hannah, ishte gjithashtu mes personave që humbën jetën kur anija 56 metra e gjatë, e cila u përmbys gjatë një stuhie të egër mëngjesin e së hënës. Trupi i saj u gjet nga zhytësit dhe u nxor në breg një ditë më parë, më 23 gusht pak para orës 13:00. Ishte personi i fundit i mbetur brenda varkës.
15 persona të tjerë mbijetuan, duke përfshirë gruan e manjatit britanik, kompania e të cilit zotëronte jahtin Bayesian.
Kapiteni James Cutfield dhe të mbijetuarit e tjerë janë marrë në pyetje nga roja bregdetare në emër të prokurorëve. Asnjëri prej tyre nuk ka treguar se si u mbyt jahti.
Ekspertët e marinës detare janë habitur dhe ngrenë pyetjen se si një varkë si Bayesian, e ndërtuar nga prodhuesi italian i jahteve të nivelit të lartë, Perini, nuk i rezistoi dot stuhisë dhe u fundos aq shpejt.
Momentalisht, prokuroria nuk ka bërë teste droge apo teste alkooli mbi ekuipazhin.
“Në atë moment ata u plagosën dhe ishin të tronditur. Për sa i përket sjelljes, po shqyrtohen jo vetëm pasagjerët, por edhe anëtarët e ekuipazhit”, u shpreh Cammarano.
Prokurori falënderoi edhe skuadrën e forcave të zhytjes që arritën të gjejnë dhe nxjerrin trupat.
Komandanti i Brigadës së Zjarrfikësve Girolamo Bentivoglio tha se: “Ne nuk i gjetëm trupat të gjithë në anën e anijes me vela. Të gjithë po kërkonin trupat e tyre në dhomat e fundit më ajër. Ne bëmë 4670 minuta zhytje në 77 orë kërkim”.
Roja bregdetare Admirali Macauda kujton se “Menjëherë pas lëshimit të raketës, komandanti na tha: kemi 12 persona në det. Në atë moment nuk dinim që brenda varkës kishte pasagjerë. Filluam të kërkojmë 7 persona të gjallë”./ Marrë nga Corriere della Sera
Lini një Përgjigje