FLASH
Shkruar nga Pamfleti
“Nuk kam pendesa”. Në prag të votimit të mocionit të besimit, që me shumë gjasë do të shënojë fundin e qeverisë së tij, François Bayrou ka sulmuar ashpër forcat politike, duke i akuzuar se janë “në luftë civile mes tyre”, por të bashkuara vetëm nga qëllimi për të rrëzuar qeverinë.
Kryeministri francez, i emëruar në janar të këtij viti, theksoi edhe një herë situatën e rëndë të financave publike, duke justifikuar nevojën për një manovër prej 44 miliardë eurosh për vitin 2026, dhe duke kritikuar deputetët që janë “peng i sloganeve partiake”.
Sot në orën 15:00, kryeministri do të hyjë në Asamblenë Kombëtare për të mbajtur fjalimin e tij politik. Ai nuk do të hyjë në detaje mbi buxhetin, por do të paraqesë gjendjen e financave publike dhe do të kërkojë besimin paraprak, në mënyrë që më pas të diskutohet projektligji për buxhetin nen për nen. E majta e bashkuar dhe ekstremi i djathtë tashmë kanë paralajmëruar një veto të pakthyeshme, pa hapësirë për kompromis. Koalicioni presidencial do të votojë i bashkuar pro, ndërsa situata te republikanët paraqitet e përçarë: kreu i grupit parlamentar Laurent Wauquiez ka dhënë liri vote, ndërsa ministri i Brendshëm, Bruno Retailleau, që është edhe sekretar i partisë, është i prirur të mos e rrëzojë qeverinë.
Votimi për besimin do të zhvillohet me votim të fshehtë dhe do të vendoset me shumicën e votave të shprehura. Bayrou mund të llogarisë rreth 210 vota, ndërsa opozita ka 353. Abstenimet e mundshme nga radhët e Republikanëve do të zvogëlonin edhe më shumë shanset e kryeministrit.
La Repubblica shkruan se nëse mocioni i besimit rrëzohet, Bayrou do të detyrohet të japë dorëheqjen te presidenti i Republikës, duke hapur krizën politike. Nga pallati Élysée nuk ka shumë siguri për hapat e ardhshëm. Emmanuel Macron “ende nuk ka vendosur” dhe është në kërkim të “zgjidhjes së duhur” për atë që duket si një periudhë e pashmangshme pas-Bayrou. Burime pranë presidencës thonë se “prioriteti i tij është stabiliteti i vendit”.
Në rrethin e ngushtë të presidentit, nuk besohet në një emërim të socialistit Olivier Faure, i cili është vetëkandiduar për të drejtuar një “qeveri bashkëjetese të majtë”, me kompromise rast pas rasti. La France Insoumise (Franca e Papërkulur) e ka cilësuar propozimin si një “mashtrim” dhe ka refuzuar të marrë pjesë. Jean-Luc Mélenchon kërkon dorëheqjen e Macron-it dhe nxit mobilizimin social: të mërkurën pritet të nisë lëvizja “Bllokojmë gjithçka“, e ndjekur më 18 shtator nga protestat sindikale.
Në anën tjetër, Rassemblement National (Tubimi Kombëtar) kërkon zgjedhje të parakohshme parlamentare. Marine Le Pen, e cila sot pritet të mësojë datën e gjyqit të apelit për dënimin që e ka bërë të pazgjedhshme, është e bindur se mund të fitojë në zgjedhje.
Lini një Përgjigje