FLASH
Shkruar nga Pamfleti
Të paktën 7 persona pritet të dëshmojnë në seancën ndaj ish-Kryeministrit Sali Berisha dhe dhëndrit të tij Jamarbër Malltezi, në kuadër të gjykimit të tyre në GJKKO, sa i takon aferës me ish-klubin Partizani.
Dëshmitarët e thirrur janë pjesë e listës së kërkuar nga SPAK, i cili akuzon ish-Kryeministrin Berisha për korrupsion pasiv, dhe dhëndrin e tij për korrupsion aktiv, pastrim parash dhe fshehje pasurie.
Seanca që pritet të nisë në orën 13:00, është e dyta me marrjen në pyetje të dëshmitarëve, ndërsa në 30 prill dha dëshminë e tij Taulant balla, kreu i Grupit Parlamentar të PS.
Në listën e dëshmitarëve të thirrur nga SPAK për seancën e sotme, por edhe ato në vijim janë ish-Presidentët e Klubit Sportiv Partizani, Albert Xhani dhe Paro Laçi, si dhe ish-drejtorët Isa Tare, Bujar Labinoti e Afrim Tole.
Në dosje e SPAK thuhet se ish-drejtorit të viteve 1995-2005, Isa Tare ka dëshmuar se atij iu premtua një apartament që të mos kundërshtonte privatizimin. Po në SPAK edhe ish Presidenti Paro Laçi ka thënë se i është ofruar një pazar nga njerëzit e Berishës për të liruar ambientet e klubit. Ndërsa Afrim Tole, drejtor i Klubit Shumësportesh Partizani, në vitet 2006-2008 ka bërë para hetuesve të SPAK një pasqyrë të të gjitha pronave që “de facto” dhe “de jure” posedonte klubi.
Dy dëshmitarët e tjerë që ka thirrur SPAK janë Dhurata Çela, ish-drejtoresha e Agjencisë së Pronave për Tiranën, dhe Petrit Kullolli, topograf.
Sipas SPAK, dosja e ish-kompleksit Partizani, ishte nga të parat që u shqyrtua nga agjencia e Pronave, ndërsa një dëshmi në prokurori e ish drejtorësh se përgjithshme të Pronave Justina Boriçi konfirmon se Dhurata Çelën e kishte emëruar me rekomandim nga lart.
GJKKO ka pranuar edhe kërkesën e avokatëve të Berishës dhe Malltezit për të thërritur si dëshmitar dhe kryeministrin Edi Rama. Ky i fundit pritet të dëshmojë në cilësinë e kryebashkiakut të Tiranës, i cili sipas tyre ka firmosur ndryshimin e destinacionit të truallit të ish kompleksit Partizani, nga terren sportiv për ndërtim, në kohën kur ka qenë kryetar.
Nuk ka pse duhen deshmitare per faktet qe jane te qarta per kriminelet e paskrupullt ndaj nje populli te tere.