FLASH
Shkruar nga Pamfleti
Kryeministri në detyrë i Kosovës, Albin Kurti, ka zhvilluar një vizitë në selinë e Bashkësisë Islame të Kosovës me rastin e festës së Kurban Bajramit, ku është pritur nga myftiu Naim Tërnava.
Gjatë urimit për besimtarët myslimanë, Kurti e cilësoi Kurban Bajramin si një festë të sakrificës, solidaritetit dhe ndihmës ndaj njerëzve në nevojë.
Ai tha se kjo festë shërben edhe si kujtesë për sakrificat e bëra për lirinë e Kosovës, duke përmendur 37 imamë dhe hoxhallarë që ranë dëshmorë gjatë luftës së fundit.
“Vizitën e parë për Kurban Bajram, si çdo vit, e bëjmë në Bashkësinë Islame të Kosovës për t’ia uruar myftiut Naim Tërnava dhe bashkëpunëtorëve të tij këtë festë të sakrificës. Kjo është një festë që na obligon të ndihmojmë njëri-tjetrin dhe të tregojmë solidaritet e bujari”, u shpreh Kurti.
Sipas tij, sakrifica e të rënëve për liri ka bërë të mundur Kosovën e lirë dhe zhvillimin e saj sot.
Kurban Bajrami konsiderohet një nga festat më të rëndësishme për besimtarët myslimanë dhe shoqërohet me mesazhe paqeje, solidariteti dhe ndihme për familjet në nevojë.
Lini një Përgjigje