FLASH
Shkruar nga Pamfleti
Rrogozhina shkon në votime ditën e sotme, ndërsa rreth 33 mijë qytetarë janë thirrur për të zgjedhur mes kandidatit Edison Memolla të PS dhe Shkëlqim Hoxha i koalicionit "Bashkë Fitojmë".
Pas shpalljes së pavlefshme të zgjedhjeve të 14 majit, 2 kandidatët Edison Memolla i PS e Shkëlqim Hoxha i koalicionit “Bashkë Fitojmë” janë sërish në garë për tu rizgjedhur në krye të bashkisë së këtij qyteti.
Janë 54 qendra votimi deri më tani, në të cilat, 32 mijë e 826 qytetarë do të drejtohen, nga ora 07:00-19:00 dhe ndryshe nga 14 maji, do të kenë vetëm një fletë votimi, atë për kryebashkiakun, ku po njëjtë si në zgjedhjet vendore, i pari në fletën e votimit do të jetë i renditur kandidati socialist Edison Memolla dhe numrin 2 do ta mbajë Shkëlqim Hoxha.
Shpresat për këtë të fundit janë shtuar, pasi në këto zgjedhje nuk do të votojnë të burgosurit, që në zgjedhjet vendore të 14 majit vulosën fitoren e Edison Memollës.
Në zgjedhjet e 14 majit, në Rrogozhinë morën pjesë në votime rreth 11 mijë votues dhe fitues u shpall socialisti Memolla me një diferencë prej 30 votash, kundrejt kandidatit të koalicionit “Bashkë Fitojmë”. Ndërkohë, numri i votave të pavlefshme në këtë zonë elektorale ishte 276 vota, 9 herë më e madhe se diferenca e votave mes dy kandidatëve.
Pas ankesave të koalicioni “Bashkë Fitojmë”, Kolegji Zgjedhor vendosi të shpallë të pavlefshme zgjedhjet pas një sërë shkeljesh.
Ndërkohë, ditën e djeshme në Drejtorinë Vendore të Policisë Durrës dhe në Komisariatin e Policisë Kavajë, janë ngritur Grupet e Drejtimit për mbarëvajtjen e procesit zgjedhor si dhe menaxhimin e çdo lloj situate bazuar në planin e veçantë të masave.
Ndërkohë ka filluar funksionimi i aplikacionit “Monitorimi elektronik i shërbimeve të Policisë së Shtetit”, i cili shfaq në kohë reale raportimet e strukturave në terren për sigurimin e rendit publik dhe të objekteve zgjedhore, gjatë procesit të votimit në territorin e Rrogozhinës.
“Policia garanton qytetarët e Rrogozhinës së ka ndërmarrë të gjitha masat, që e drejta e tyre kushtetuese për zgjedhjen e përfaqësuesve të pushtetit lokal, të ushtrohet e lirë, e qetë, e pacenuar dhe pa intimiduar prej askujt”, thuhet në njoftimin e Policisë së Shtetit.
Lini një Përgjigje