FLASH
Shkruar nga Pamfleti
Kryeministri Edi Rama Kryeministri Edi Rama ka reaguar në lidhje me dialogun ndërmjet Serbisë dhe Kosovës për depërshkallëzimin e tensioneve.
Sipas tij, Albin Kurti bëri një zgjidhje të mençur duke pranuar propozimin e BE.
'Populli i mençur shqiptar dhe jo vetëm ai, meqë ra fjala, thotë “më mirë vonë se kurrë”. Nuk mund ta fsheh kënaqësinë që lidershipi i Kosovës më në fund bëri thirrjen e duhur në takimin e djeshëm në Bruksel! Kosova është në një vend shumë më të mirë sot duke pranuar me mençuri propozimin e BE-së më 21 tetor – një hap shumë domethënës përpara.
Është koha që edhe Serbia të bëjë të njëjtën gjë. Çdo gjë që është pranuar dhe rënë dakord duhet të zbatohet pa asnjë vonesë. Unë u bëj thirrje partnerëve tanë perëndimorë që të ruajnë këtë vrull dhe të shtyjnë përpara drejt një përparimi përfundimtar.
Mjaft me shikimin e gishtit ndërsa gishti tregon hënën. Mjaft me të njëjtat gërmadha të vjetra dhe të rrezikshme. Mjaft me shmangien e paqes dhe kënaqjen me fantazmat e së kaluarës për hir të politikës së brendshme të imët. Shikoni se çfarë ndodh me ata që shmangin paqen dhe përfshihen në lojëra me shumën zero. Ne kemi nevojë për paqe, stabilitet dhe bashkëpunim në fqinjësinë tonë. Bëj paqe, për hir të Zotit, dhe vazhdo.', shkruan Rama.
Qeveria e Kosovës bëri të ditur përmes një komunikate zyrtare për mediat se e kanë pranuar Marrëveshjen Bazike të Brukselit të 27 Shkurtit 2023 dhe Aneksin Zbatues të Ohrit të 18 Marsit 2023 në takimin që kryeministri Kurti ka zhvilluar me liderë të Bashkimit Europian.
Gjithashtu qeveria e Kosovës bëri me dije se Presidenti i Serbisë, Aleksandër Vuçiç ka refuzuar të nënshkruajë marrëveshje me Kosovën, dhe ka kërkuar që t’i pranohet një letër anësore, me të cilën sipas Kosovës, i zhbën tri parime të Marrëveshjes Bazë, të Aneksit të Zbatimit si dhe të draftit të propozuar nga pesë emisarët me 21 Tetor 2023.
Në takimin me liderë të BE-së, Kryeministri Kurti rikujtoi që ai ishte i gatshëm të nënshkruajë edhe në Bruksel më 27 Shkurt 2023, edhe në Ohër më 18 Mars 2023, edhe sonte, më 26 Tetor 2023, duke theksuar që pikërisht Samiti i Këshillit Evropian në Bruksel është ngjarja e duhur, në vendin e duhur për nënshkrim të Marrëveshjes Bazike, përfshirë edhe draftin e ofruar nga BE-ja dhe ShBA-të për zbatimin e nenit 7 në ndërlidhje të nenit 10 të Marrëveshjes Bazike.
Lini një Përgjigje