FLASH
Shkruar nga Pamfleti
Këshilli për Mandatin dhe Imunitetin do të mblidhet më 28 janar, ku do të shqyrtohet kërkesa e SPAK për zv.Kryeministren Belinda Balluku, njëherazi edhe ministre e Infrastrukturës dhe Energjisë.
Por demokratët duket se janë të pakënaqur me datën, pasi pretendojnë se mbledhja duhej të zhvillohej më shpejt. Gazment Bardhi, kreu i Grupit Parlamentar të PD-së, akuzoi Kryeparlamentarin Niko Peleshi, se ka shkelur Rregulloren e Kuvendit, duke zbatuar urdhërat politikë të Kryeministrit Edi Rama.
“Pas kallëzimit penal për shpërdorim detyre nga Grupi Parlamentar i PD, sot pasdite Niko Peleshi ka njoftuar se do të mbledhë Këshillin e Mandateve në datën 28 Janar 2026, pra fiks 6 javë pasi SPAK ka paraqitur kërkesën.
Ky bllokim 6-javor është i paprecedent dhe një akt i lartë papërgjegjshmërie nga ana e mazhorancës socialiste, që ka vendosur të jetë bunkeri i të korruptuarve të qeverisë së Edi Ramës.
Pengimi i drejtësisë dhe bllokimi nga Kuvendi i shqyrtimit të kërkesës së SPAK për 6 javë, ka cënuar hetimet dhe i ka dhënë mundësi të pandehurës Balluku që të tentojë prishjen e provave/intimidimin e dëshmitarëve.
Edi Rama nuk fshihet më në vullnetin e tij për të mbrojtur korrupsionin qeveritar. Akte si këto, të diktuara nga tmerri se drejtësia po i afrohet më në fund atij vetë, tregojnë se sa të shpejtë dhe të dhimbshëm do ta ketë fundin e tij.
Në emër të Grupit Parlamentar të PD dënoj me forcë shkeljen e Rregullores nga Niko Peleshi dhe zbatimin prej tij të urdhërit politik të Edi Ramës për të zvarritur çështjen dhe për të penguar drejtësinë”, shprehet Bardhi.
Lini një Përgjigje