FLASH
Shkruar nga Pamfleti
Përmes një shkrese zyrtare, përfaqësuesi i grupit të Enkelejd Alibeajt, Indrit Sefa ka njoftuar KQZ-në se Lulzim Basha është dorëhequr nga posti i kryetarit të Partisë Demokratike, referuar deklaratës publike që ai ka dhënë më datë 21 Mars 2022 në mënyrë publike para Kryesisë së PD-së.
Shkresa i drejtohet KQZ-së me argumentimin se dokumentat janë të plota dhe ata duhet të regjistrojnë Partinë Demokratike në zgjedhje.
“Basha nuk ndodhte faktikisht në detyrë, për shkak të heqjes dorë nga detyra në mënyrë publike përpara Kryesisë së Partisë më 21 Mars 2022”, thuhet mes të tjerash në shkresë.
Partia Demokratike ka njoftuar zyrtarisht Ilirjan Celibashin se nuk do dorëzojnë dokument të firmosur nga Lulzim Basha. Në letrën zyrtare, grupi i Alibeajt thotë se dokumentacioni i paraqitur është i plotë sipas rregullave.
Letra e plotë
I nderuar z. Komisioner,
Jemi njohur me vendimin tuaj nr. 158, datë 09.03.2023, ku është urdhëruar "Kthimi për plotesim i dokumentaconit për regjistrimin si subjekt zgjedhor të Partisë Demokratike te Shqiperise". Me anë të ketij njoftimi, ju informojme se z. Basha nuk ndodhet faktikisht në detyrë, për shkak të heqjes dorë nga detyra në mënyrë publike, përpara Kryesisë se Partise, me date 21 Mars 2022 (njoftimi publik bashkëlidhur).
Eshte fakt i njohur botërisht dhe që nuk ka nevojë të provohet, se prej një kohe të gjatë Partia Demokratike e Shqipërisë, partia më e madhe e opozitës, po kalon nje periudhë konflikti të brendshëm, dhe në mungesë në detyrë të Kryetarit të Partisë. Në përputhje me legjislacionin ne fuqi dhe rregullat e brendshme të funksionimit të Partisë Demokratike (konkretisht nenit 46 te Statutit të PDSH), që përcaktojnë se: "Kryetari i Partisë ndihmohet nga Nënkryetarët dhe Sekretari i Përgjithshëm......Kryetari i Partisë gjatë veprimtarisë së tij të përditshme i cakton detyra dhe fusha të caktuara përgjegjësie Nënkryetarëve të Partisë. Në mungesë të zgjatur të kryetarit dhe me autorizim të tij, njëri prej tyre zëvendëson Kryetarin", është lëshuar Autorizimi i Përgjithshëm datë 18 Mars 2022. Për shkak se dorëheqja e Kryetarit është fakt, edhe pse nuk është pasqyruar në regjistrin e partive politike, për shkak të moszgjedhjes së Kryetarit te ri të Partisë Demokratike të Shqipërisë, në kuptim të ligjit nr. 8580, datë 17.02.2000 "Per partitë politike", i ndryshuar, funksionimi i Partisë Demokratike për aspektet që kanë të bejnë me zgjedhjet vendore realizohet sipas "Autorizimit të Përgjithshëm" të datës 18 Mars 2022.
Përsa më lart, në mbeshtetje të nenit 64 të ligjit nr. 10019, datë 29.12.2008, "Kodi Zgjedhor i Republikës së Shqipërisë", i ndryshuar, duke qene se dokumentacioni i dërguar është i plotë dhe nisur nga fakti që është objektivisht dhe ligjërisht e pamundur mos zbatimi i Autorizimit të Përgjithshëm të datës 18 Mars 2022, kerkojmë shfuqizimin kryesisht të vendimit nr. 158/2023 dhe vijimin e procedurës ligjore të regjistrimit të Partisë Demokratike të Shqipërisë si subjekt zgjedhor në zgjedhjet e 14 Majt 2023, duke mbajtur në konsideratë rrethanat ligjore dhe faktike si më sipër.
Lini një Përgjigje