FLASH
Shkruar nga Pamfleti
Sefer Selimaj alias Ani Ibraliu u lokalizua dhe u vu në pranga në kuadër të operacionit “The Wanted”, në bashkëpunim mes Interpol Tiranës dhe Interpol Romës.
Pas nëntë vitesh në arrati, një 42-vjeçar i dënuar nga drejtësia shqiptare për trafikim të qenieve njerëzore është arrestuar në Itali me qëllim ekstradimin drejt Shqipërisë.
Policia e Shtetit bëri të ditur se në kuadër të operacionit ndërkombëtar të koduar “The Wanted”, u vu në pranga shtetasi Sefer Selimaj alias Ani Ibraliu, 42 vjeç, i cili ishte shpallur në kërkim ndërkombëtar nga autoritetet shqiptare.
Arrestimi u realizua falë bashkëpunimit dhe shkëmbimit të informacionit mes specialistëve të Interpol Tiranës dhe Interpol Romës, të cilët arritën të lokalizonin vendndodhjen e të kërkuarit në territorin italian.
Sipas policisë, Gjykata e Apelit e Tiranës e ka dënuar Selimajn në vitin 2017 me 15 vite burgim për veprën penale “Trafikimi i qenieve njerëzore”, një nga veprat më të rënda penale që lidhet me krimin e organizuar.
Nga dënimi i dhënë nga drejtësia shqiptare, 42-vjeçarit i kanë mbetur për të vuajtur edhe 13 vjet, 10 muaj dhe 19 ditë burgim.
Autoritetet shqiptare dhe ato italiane po vijojnë procedurat ligjore për ekstradimin e tij, me qëllim kthimin në Shqipëri për ekzekutimin e pjesës së mbetur të dënimit.
Operacioni “The Wanted” është pjesë e bashkëpunimit të vazhdueshëm mes agjencive ligjzbatuese shqiptare dhe partnerëve ndërkombëtarë për lokalizimin dhe arrestimin e personave të shpallur në kërkim ndërkombëtar, të cilët përpiqen t’i shmangen drejtësisë duke u fshehur jashtë vendit.
Lini një Përgjigje