FLASH
Shkruar nga Vistazo
Mediat ekuadoriane kanë nxjerrë detaje për Dritan Gjikën, personin që dyshohet se drejtonte një rrjet trafiku kokaine. Sipas tyre, ai ishte i lidhur me biznesmenin ekuadorian Rubén Chérres, i cili u vra vitin e kaluar pasi u zbulua një komplot korrupsioni me kompanitë e sektorit publik.
Organizata vepronte duke dërguar kokainë nga Kolumbia, përmes Ekuadorit, në Evropë dhe më pas pastronte paratë duke blerë pasuri të paluajtshme ndërmjet shoqërive tregtare të themeluara ligjërisht.
Emri i shqiptarit, i lindur në vitin 1976 dhe që jeton në Ekuador që nga viti 2013, doli në dritë si një nga personazhet kryesore të komplotit që përfshinte Rubén Cherres ( miku i Danilo Carrera, kunati i ish-presidentit Lasso). Të dy ishin ortakë në disa kompani.
Sipas të dhënave nga vendi i tij, Dritan Gjika ka kryer gjimnazin në Shqipëri. Sidoqoftë, në Ekuador financat e tij u ngritën gjatë pandemisë.
Cili ishte aktiviteti fitimprurës i Gjikës në Ekuador? Gjika themeloi një duzinë kompanish në të njëjtën ditë, më 17 qershor 2021, së bashku me Rubén Cherres. Gjëja e dyshimtë e kompanive të krijuara njëkohësisht është se ato kanë një gamë të gjerë objektesh sociale, duke filluar nga prodhimi i mishit, turizmi dhe promovimi i kulturës.
Në një hetim nga Revista Vistazo në aleancë me Iniciativën Globale Kundër Krimit të Organizuar dhe Institutin Prensa y Sociedad, IPYS, u zbulua se, më 7 janar 2023, në prag të shpërndarjes së audios së parë që zbuloi rastin që përfshinte Cherrez, shqiptari Gjika u nis për në Turqi. Që atëherë nuk dihet vendndodhja e tij.
Drejtori antidrogë i Policisë Kombëtare bëri me dije se për momentin nuk është ndaluar, por ka dyshime mbi vendet se ku fshihet.
"Ne jemi duke u koordinuar me homologët tanë në Spanjë që të mund ta gjejmë atë", tha Villarroel.
Ai theksoi gjithashtu se Gjika dhe Cherres kanë qenë ortakë në disa kompani ndërtimi nga të cilat për momentin nuk ka asnjë të dhënë se kanë marrë pjesë në transportin e drogës.
Operacioni i madh ‘Phoenix XIII’
Në Spanjë e Ekuador u kryen 57 bastisje. Në Ekuador, pati 40 bastisje në provincat e Guayas, El Oro, Santa Elena, Cotopaxi, Pichincha dhe Azuay. Ndërsa në Spanjë ishin 17, me qendër në Barcelonë, Málaga, Marbella dhe Valencia.
Si rezultat i operacioneve të njëkohshme, u arrestuan 30 persona - 18 në Ekuador dhe 12 në Spanjë - të kombësive të ndryshme, duke përfshirë ekuadorianë, kolumbianë, argjentinas, spanjollë, shqiptarët dhe kinezë. Megjithatë, Villarroel shpjegoi se numri i njerëzve të përfshirë mund të rritet.
Gjithashtu, gjatë hetimeve u sekuestruan 2377 kilogramë drogë, 10 armë, 27 pajisje celulare, 22 automjete, pasuri të paluajtshme, afro 500 mijë euro në Spanjë, teksa në Ekuador paratë po numërohen ende.
Villarroel shtoi se, përveç drejtuesit, struktura kishte edhe koordinatorë drejtues, të ngarkuar për lidhjet mes grupeve dhe koordinatorë të logjistikës, përgjegjës për transportin, ruajtjen dhe sigurinë. Po ashtu, ata kishin persona që bënin pagesat për drogën që transportohej në Evropë.
“Ata sollën drogën nga Valle del Cauca (Kolumbi) dhe me rrugë tokësore arritën në qytetin e Tulcan (Ekuador). Më pas ata përparuan përgjatë rrugëve me kamionë për në qendrat e grumbullimit, ku fshehën lëndët narkotike, në Cotopaxi, Los Ríos dhe Guayas për të nxjerrë më vonë drogën, për t'i transferuar në ferma dhe më pas për t'i kamufluar në kontejnerë në porte", tha zëdhënësi i Policisë Kombëtare.
Sipas hetimit, u identifikuan gjashtë kompani të inkorporuara ligjërisht në Ekuador dhe katër në Spanjë.
Për këtë operacion janë mobilizuar 400 oficerë nga Ekuadori dhe 350 nga Spanja. Përveç kësaj, Daniel Vázquez, kreu i Seksionit Operativ të Brigadës Qendrore kundër Pastrimit të Parave të Policisë Spanjolle, raportoi se ata kishin mbështetjen e organizatave evropiane si Europol për të realizuar atë që ai e quajti një moment historik të paprecedentë. Dhe ai shtoi se, "krimi i organizuar nuk njeh kufij", kështu që bashkëpunimi midis të dy kombeve ishte thelbësor për të çmontuar një rrjet kriminal ndërkombëtar. /Pamfleti
Lini një Përgjigje