FLASH
Shkruar nga Pamfleti
Presidenti i Shteteve të Bashkuara të Amerikës, Joe Biden në një deklaratë për mediat ka shpallur sanksionet e reja kundër Iranit, pas sulmeve ndaj Izraelit. Gjithashtu presidenti Biden ka theksuar edhe mbështetjen për mbrojtjen e Izraelit, ushtarëve si dhe partnerëve në rajon.
“Më pak se një javë më parë, Irani nisi një nga sulmet më të mëdha me raketa dhe dron që bota ka parë ndonjëherë kundër Izraelit. Së bashku me aleatët dhe partnerët tanë, Shtetet e Bashkuara mbrojtën Izraelin. Ne ndihmuam në mposhtjen e këtij sulmi. Dhe sot, ne po e mbajmë Iranin përgjegjës, duke vendosur sanksione të reja dhe kontrolle të eksporteve ndaj Iranit”, tha Biden.
Biden tha se masat kishin në shënjestër 16 individë dhe dy entitete, që mundësonin prodhimin e UAV-ve të Iranit, duke përfshirë motorët që fuqizojnë dronët Shahed të Iranit.
“Sanksionet synojnë liderë dhe entitete të lidhura me Korpusin e Gardës Revolucionare Islamike, ministrinë e mbrojtjes të Iranit dhe programin e raketave dhe dronëve të qeverisë iraniane që mundësoi këtë sulm të pacipë. Ndërsa diskutova me liderët e mi të G7 mëngjesin pas sulmit, ne jemi të përkushtuar të veprojmë kolektivisht për të rritur presionin ekonomik ndaj Iranit”, u shpreh presidenti amerikan Biden.
Gjatë fjalës së tij, Biden tha se edhe aleatët e SHBA-së do të vendosin sanksione shtesë për të ndalur skenarët destabilizues të Iranit, ndërsa ritheksoi edhe njëherë mbështetjen për sigurinë e Izraelit.
“Edhe aleatët dhe partnerët tanë do të sanksione dhe masa shtesë për të kufizuar programet ushtarake destabilizuese të Iranit. Gjatë administratës sime, Shtetet e Bashkuara kanë sanksionuar mbi 600 individë dhe entitete – duke përfshirë Iranin dhe përfaqësuesit e tij, Hamasin, Hezbollahun, Houthis dhe Kataib Hezbollah. Dhe ne do të vazhdojmë me të. Kam urdhëruar ekipin tim, duke përfshirë departamentin e thesarit, të vazhdojë të vendosë sanksione që synojnë industritë ushtarake të Iranit. Le të jetë e qartë për të gjithë ata që mundësojnë ose mbështesin sulmet e Iranit: Shtetet e Bashkuara janë të përkushtuara ndaj sigurisë së Izraelit. Ne jemi të përkushtuar ndaj sigurisë së personelit dhe partnerëve tanë në rajon. Dhe ne nuk do të hezitojmë të ndërmarrim të gjitha veprimet e nevojshme për t'ju mbajtur përgjegjës", theksoi Biden.
Lini një Përgjigje