FLASH
Shkruar nga Diplomatico | Pamfleti.net 
Nga Islanda e deri në Zvicër: Si shtetet dikur neutrale po e shohin Brukselin si strehë kundër epokës së Putinit, Trumpit dhe Xi Jinpingut...
Në të kaluarën, shtete si Zvicra, Islanda dhe Norvegjia mund të lejonin vetes luksin e neutralitetit, duke zgjedhur të mos jenë pjesë e BE-së por duke përfituar nga tregu i përbashkët ose mbështetja e NATO-s. Por kjo epokë ka mbaruar. Lufta në Ukrainë, rikthimi i Trumpit, rritja e ndikimit të Kinës dhe agresiviteti i Rusisë i kanë detyruar këto vende të rimendojnë strategjitë e tyre të mbijetesës.
Islanda, e cila dikur refuzoi anëtarësimin në BE për të mbrojtur peshkimin, tani përgatitet për referendum për anëtarësim deri në vitin 2027. Retorika e Trumpit mbi NATO-n ka shtyrë politikën islandeze të mos mbështetet vetëm te SHBA për mbrojtje.
Norvegjia, që gjithashtu ka refuzuar anëtarësimin në BE në dy referendume, po përballet me një rritje të mbështetjes publike për një tjetër votim. Pavarësisht pasurive të saj, ndjeshmëria ndaj ndryshimeve globale e bën këtë vend të ekspozuar.
Zvicra, që kishte bërë një "fetish" nga neutraliteti i saj, tani ka rifilluar bisedimet me BE-në dhe po bashkëpunon më shumë me NATO-n, për herë të parë që prej tre dekadash.
Ky rreshtim i ri vjen në një moment kur edhe vende si Armenia, Andora dhe madje edhe Kanadaja (sipas sondazheve të fundit) e shohin BE-në si një alternativë ndaj dominimit të superfuqive.
Shtetet e vogla, edhe ato më të pasurat, janë të pambrojtura në një botë ku rregullat ndërkombëtare po zëvendësohen nga ligji i forcës. BE-ja, me gjithë ndarjet dhe grindjet e brendshme, ofron një mburojë: qasje në treg, siguri kolektive, dhe mbi të gjitha, një sistem vlerash që shmang invazionet, diktaturat dhe grabitjet ekonomike.
Në këtë kontekst, edhe vendet e Ballkanit Perëndimor, përfshirë Shqipërinë, duhet të shohin me më shumë seriozitet integrimin e plotë në strukturat euro-atlantike. Nuk është më çështje "zgjedhjeje strategjike", por çështje mbijetese./Pamfleti
Lini një Përgjigje