FLASH
Shkruar nga Pamfleti
Ndërsa të dhënat zyrtare zhduken nga raportet shtetërore ruse, ekspertët paralajmërojnë se humbjet nga lufta e Putinit në Ukrainë janë shumë më të mëdha sesa numrat e deklaruara.
Demografia në Rusi nuk ekziston më. Ose më saktë, ajo nuk shfaqet më në raportet mbi situatën socio-ekonomike që Shërbimi Federal i Statistikave Shtetërore (Rosstat) i vendit publikon çdo muaj. Raporti i majit nuk përmban shifra që lidhen me popullsinë ruse: asnjë lindje, asnjë vdekje, asnjë martesë apo divorc. Në botimin e mëparshëm, të dhënat demografike ishin të publikuara, por jo më të ndara sipas rajonit. Tani, edhe shifrat e përgjithshme janë mbajtur të fshehta.
“Na është mohuar plotësisht informacioni në lidhje me popullsinë e vendit tonë”, thanë analistët nga grupi i ekspertëve MMI për “The Moscow Times”.
Përvoja sovjetike e vitit 1937, kur kryeministri i atëhershëm Jozef Stalin shtypi regjistrimin e popullsisë që zbuloi se sa njerëz kishte vrarë dhe ekzekutuar regjimi i tij, na kujton se kur një statistikë zhduket, kjo ndodh sepse zbulon një të vërtetë me të cilën Kremlini nuk do të donte të përballej. Në vitet e fundit, qeveria ruse kishte klasifikuar tashmë shumë forma të të dhënave të cilat i konsideronte si “të ndjeshme”, nga humbjet në fushën e betejës deri te shpenzimet ushtarake. Më shumë se një e treta e artikujve në buxhetin e shtetit nuk tregonin detaje.
Të dhëna alarmuese
Sekreti shtetëror tani mbulon edhe treguesit ekonomikë, duke përfshirë madhësinë e rezervave të arit dhe emrat; pagat e menaxherëve të lartë në kompanitë e mëdha shtetërore, për t'i mbrojtur ato nga sanksionet perëndimore. Por heqja e shifrave të lindjeve dhe vdekjeve tregon se hendeku demografik i hapur nga lufta po shndërrohet në një humnerë. 1 milion ushtarë që, sipas burimeve të pavarura, janë vrarë, gjymtuar, kapur, zhdukur ose kanë dezertuar, më në fund po fillojnë të shfaqen në statistika.
Zyrtarisht, sipas të dhënave më të fundit nga Rosstat, popullsia e Rusisë ishte 146.1 milionë më 1 prill. Në tremujorin e parë të vitit 2025, pati 289,000 lindje dhe 472,000 vdekje, duke rezultuar në një rënie demografike prej 183,000. Kjo u kompensua pjesërisht nga 122,000 emigrantë.
Shkalla e vdekshmërisë i bën të dhënat edhe më alarmante.
Është një trend negativ që ka vazhduar për dekada të tëra, ndërsa qeveria kishte parashikuar tashmë se popullsia ruse do të tkurrej në 138.8 milionë gjatë 20 viteve të ardhshme. Shkalla e lindjeve vijon të jetë në nivelet më të ulëta historike çdo muaj, me luftën që nxit një rritje të shitjeve të kontraceptivëve, por shkalla e vdekshmërisë është ajo ku të dhënat bëhen veçanërisht alarmante.
Edhe agjencia zyrtare e statistikave ka regjistruar një rënie të jetëgjatësisë në vitin 2024 në 72.84 vjet, shtatë muaj më pak në vetëm një vit. Të dhënat e vdekshmërisë, të ndara më parë sipas shkakut, grup moshës dhe rajonit, janë censuruar gjithashtu. Nuk është e vështirë të hamendësohet pse. Demografi Aleksey Raksha tha për “The Moscow Times” se vdekjet në luftë pasqyrohen në të dhënat e Rosstat me një vonesë prej 12 deri në 18 muajsh, kështu që vala e viktimave nga ofensiva e madhe ruse e vitit të kaluar do të fillojë të shfaqet vetëm tani në numra.
Një qëllim i pamundur
Shtrohet pyetja nëse censura e Rosstat ka për qëllim ta mbajë publikun e gjerë në errësirë apo të mbrojë një entuziast të të dhënave në Moskë: Presidentin rus Vladimir Putin. Ai i ka ngarkuar qeverisë detyrën të ndalojë rënien e popullsisë dhe të rrisë jetëgjatësinë në 78 vjet.
Ky objektiv fillimisht ishte vendosur për vitin 2024, por që atëherë është shtyrë për në vitin 2030. Është një objektiv ambicioz, edhe në rrethana normale. Rusia është i vetmi vend në botë që inkurajon në mënyrë aktive shtatzënitë e të miturve.
Për të inkurajuar lindjen e fëmijëve, disa rajone kanë futur madje edhe stimuj financiarë për studentet e universitetit dhe të shkollave të mesme që të mbeten shtatzënë.
Ministri i Shëndetësisë Mikhail Murashko pohon se praktika e zakonshme ruse e shtyrjes së shtatzënisë për të përfunduar arsimin është "shkatërruese" dhe se vajzat duhet të mësohen që në adoleshencë se lindja e fëmijëve duhet të jetë e para.
Pavarësisht se është i vetmi vend në botë që inkurajon në mënyrë aktive shtatzënitë e të miturve në vend që t'i parandalojë ato, Putini ende nuk ka ushtarë të mjaftueshëm. Vetëm dje, u miratua një ligj i ri që lejon edhe personat pa shtetësi të regjistrohen në forcat e armatosura ruse./ Përshtati “Pamfleti” nga “WorldCrunch”.
Lini një Përgjigje