FLASH
Shkruar nga Pamfleti
Ata që e njohin mirë, nuk habiten kur presidenti demokrat i SHBA-së, Joe Biden, shan Donald Trump, por gjithmonë me dyer të mbyllura.
Sipas “Politico”, në daljet e tij publike, 81-vjeçari Biden përpiqet të mbajë një qëndrim zyrtar, mirëpo, sa herë që ndodhet pranë fytyrave të njohura, ai relaksohet aq shumë dhe flet “lirshëm”.
Për miqtë dhe bashkëpunëtorët e ngushtë, presidenti amerikan e ka quajtur Trump një "dreq të sëmurë" që kënaqet me fatkeqësitë e të tjerëve.
Një nga personat që dëgjoi nga presidenti amerikan komentet tejet fyese ndaj miliarderit republikan, tha për “Politico” se ai e flet në mënyrë ofenduese ndaj ish-presidentit. Nga ana e saj, Shtëpia e Bardhë refuzoi të japë komente për artikullin.
Imazhi publik i Biden bie ndesh me fjalët e tij kur ai është në prapaskenë.
Megjithatë, sharjet e tij sugjerojnë një zemërim që ai ka ndaj rivalit politik që ai arriti ta anashkalojë në 2020 duke fituar presidencën dhe mund të përballet sërish në zgjedhjet e nëntorit.
Mospëlqimi i Biden-it për Trump-in nuk ka qenë kurrë sekret, ai është intensifikuar muajt e fundit pasi ish-presidenti del si kandidati kryesor për nominimin presidencial republikan.
Stafi i Trump, megjithatë, e qortoi Biden për komentet e tij abuzive.
"Është një turp që mashtruesi Joe Biden nuk respekton zyrën e presidentit si publikisht ashtu edhe privatisht", tha Chris Lasivita, një këshilltar i lartë i fushatës së Trump.
“Por përsëri, nuk është çudi që ai nuk respekton presidentin e 45-të në të njëjtën mënyrë që nuk respekton popullin amerikan me politikat e tij të dështuara”, shtoi ai.
Biden, megjithatë, beson se Trump është bërë më i urryer me kalimin e kohës.
Zemërimi i Biden ndaj Trump është nxitur gjithashtu, sipas njerëzve të afërt të tij, nga rrëfimet se ish-presidenti mbështeti trazirat e 6 janarit ndërsa ishte ulur në dhomën e tij të ngrënies jashtë Zyrës Ovale në Shtëpinë e Bardhë.
Për më tepër, fjalët e tij të ngrohta për të fortin e Kremlinit, Vladimir Putin, dihet se e kanë bërë presidentin demokrat të mbajë një qëndrim më të ashpër.
Biden u zemërua veçanërisht kur iu tha se Trump refuzoi të vizitonte një varrezë ushtarake në shi dhe është tallur me sakrificat e ushtarëve të rënë amerikanë, thekson “Politico”.
Lini një Përgjigje