FLASH
Shkruar nga Pamfleti
Dhjetëra mijëra studentë, nxënës dhe qytetarë marshuan të premten nëpër rrugët kryesore të Beogradit. Marshi ishte kulmi i mobilizimeve të sotme dhe grevës së përgjithshme që u zhvillua pas thirrjes së studentëve.
Greva u ndoq kryesisht nga biznese private, shoqata të avokatëve, artistë dhe grupe qytetarësh, ndërsa sektori publik funksionoi normalisht, ashtu si shumica e objekteve tregtare. Marshimi përfundoi jashtë godinës së televizionit publik (RTS) në shenjë mbështetjeje për gazetarët e tij, të cilët po përballen me sulme vulgare nga autoritetet për shkak se po mbulojnë protestat e studentëve.
Rasti i fundit ishte kur Presidenti i Republikës, Aleksandar Vuçiç, në një fjalim para mbështetësve të tij në Serbinë lindore, e cilësoi si të “dëmtuar” gazetarin e RTS-së që mbuloi mobilizimin e studentëve të shtunën e kaluar në qytetin e Nishit. Pjesa e diskutueshme e fjalimit të Vuçiçit u transmetua në buletinin kryesor të lajmeve të kanalit të parë të televizionit publik pa koment, gjë që shkaktoi reagime. Administrata e RTS dënoi sjelljen e Presidentit të Republikës me 24 orë vonesë.
Mbledhja para televizionit publik nisi në mënyrë simbolike në orën 19:30, kohë kur filloi buletini kryesor i lajmeve. Turma përshëndeti një grup gazetarësh dhe teknikësh të RTS të cilët lexuan kërkesat e tyre për administratën.
Ndër të tjera, ata kërkojnë që administrata të kërkojë falje publike për reagimin e vonuar në mbrojtje të gazetarëve të saj, si dhe për pasqyrimin joadekuat të protestave të studentëve. Gazetarët e RTS kërkojnë raportim objektiv pa përjashtim e diskriminim dhe kërkojnë dorëheqjen e drejtuesve të departamentit të lajmeve.
Protestat e studentëve në Serbi do të vazhdojnë, ndërsa më 15 mars është planifikuar një tubim i madh në Beograd dhe bllokimi i qendrës së qytetit.
Studentët në Serbi kanë protestuar për më shumë se tre muaj kundër korrupsionit.
Lini një Përgjigje