FLASH
Shkruar nga Pamfleti
NATO po intensifikon masat për forcimin e krahut të saj lindor në Evropë pas incidentit të fundit në Rumani, ku një dron i atribuuar Rusisë u përplas në çatinë e një pallati banimi. Këtë e bëri të ditur Admirali Giuseppe Cavo Dragone, kryetar i Komitetit Ushtarak të NATO-s.
Në një intervistë për televizionin Al Arabiya, Dragone u shpreh se aleanca ka nisur tashmë veprime konkrete për të rritur sigurinë në lindje të territorit të saj.
“NATO tashmë po ndërmerr veprime, po përforcon krahun lindor. Ne po ndërmarrim veprime atje”, deklaroi ai, kur u pyet për planet e aleancës lidhur me vendosjen e trupave shtesë dhe angazhimin për mbrojtjen e çdo pjese të territorit të vendeve anëtare në rast incidentesh të ngjashme.
Sipas tij, NATO synon të krijojë atë që e përshkroi si një autoritet të sigurt, me qëllim që i gjithë rajoni nga Deti Baltik deri në Detin e Zi të jetë i ndërlidhur dhe më i mbrojtur. Megjithatë, admirali italian nuk dha detaje të mëtejshme mbi përbërjen e kësaj strukture apo forcat që do të përfshihen.
Incidenti që nxiti reagimin e aleancës ndodhi më 29 maj, kur Ministria e Mbrojtjes e Rumanisë njoftoi se një dron ishte rrëzuar mbi çatinë e një pallati në qytetin Galati. Autoritetet rumune kanë akuzuar Rusinë si përgjegjëse për ngjarjen.
Lini një Përgjigje