FLASH
Shkruar nga Pamfleti
Gjyqtarja dhe prokurori i çështjes për vrasjen e Martin Canit, kanë mbërritur mëngjesin e sotëm në spitalin privat në kryeqytet, ku i mituri i dyshuar si autor i krimit, po merr ndihmë mjekësore për shkak të lëndimeve që ka marrë gjatë konfliktit me bashkëmoshatarin e tij, më 18 nëntor.
Sot (22 nëntor) do të zhvillohet në ambientet e këtij spitali seanca për vleftësimin dhe caktimin e masës së sigurimit ndaj të miturit, Mario Perlleshaj, i cili ndodhet prej ditës së ngjarjes i shtuar në këtë spital.
Perlleshaj goditi me thikë në zemër bashkëmoshatarin e tij pas një sherri mes tyre pak metra larg shkollës “Fan Noli”.
14-vjeçari është arrestuar nën akuzën “Vrasja me dashje e kryer ndaj të miturit” dhe “Prodhimi, mbajtja, blerja apo shitja pa leje e armëve të ftohta”.
Ditën e djeshme lidhur me këtë ngjarje u zhvillua edhe një protestë në kryeqytet, nga prindër të nxënësve, shoqëruar me fëmijët e tyre. Ajo që mbeti pas nga protesta, ishin shenjat dhe gjurmët e duarve me ngjyrën e kuqe (simbol të gjakut) në muret e ministrisë së Arsimit.
Lini një Përgjigje