FLASH
Shkruar nga Pamfleti
Në Dibër kanë mbetur dy kutitë e fundit. Sipas të dhënave aktuale, PS vazhdon epërsinë edhe në Dibër. Socialistët kanë përmbysur rezultatin e katër viteve më parë në këtë qark, ku deri më tani shifrat e siguruara përkthehen në 3 mandate, me mbi 10 mijë vota diferencë.
PS ka marrë 32703 vota, ose 56.3% të votave, e thënë ndryshe gati 10 690 vota para rivalëve.
Krahasuar me vitin 2021, PS ka shënuar një rritje të ndjeshme prej 11.6%, pasi në zgjedhjet e mëparshme kishte 44.7% të votave dhe 2 mandate.
Koalicioni Partia Demokratike – ASHM renditet i dyti me 22013 vota ose 37.9% të totalit, duke siguruar 2 mandate. Krahasuar me rezultatin e vitit 2021, PD ka humbur terren me -14.4%, pasi atëherë kishte marrë 52.3% dhe 3 mandate.
Partitë e tjera nuk kanë arritur të sigurojnë mandate në këtë qark. Një rritje me shifrat e fundit ka pësuar PSD.
Për këtë rezultat, ka folur edhe Blendi Klosi, përfaqësuesi politik i PS në këtë qark i cili tha se është shumë i lumtur për arritjen e këtij objektivi madhor, për ta kthyer Dibrën sipas tij me flamurin e PS në krye dhe me një diferencë të jashtëzakonshme mbi rivalët.
“Objektivin tonë madhor për ta rikthyer Dibrën pas 35 vitesh me flamurin e PS e bëmë realitet. Ishte një garë jo e lehtë, ishte e vështirë, por ja, arritëm. Patëm një diferencë të jashtëzakonshme, mbi 10 mijë vota vetëm nga votat e numëruara në territor. Shpresojmë shumë që edhe diaspora të sjellë një diferencë të mirë për PS. Realisht ndihem shumë mirë që pata fatin të drejtoja këtë fushatë elektorale me popullin e mrekullueshëm dibran dhe me strukturat e PS në Mat, në Klos, në Bulqizë dhe këtu në Dibër, duke shënuar për herë të parë një fitore spektakolare të PS në qarkun e Dibrës. Në ndryshim me vitin 2021, ku ishim 5 mijë vota më pak, tani jemi më shumë se 10 mijë vota më shumë dhe mendoj se ky është një mesazh i mirë për politikën. Një qark ku investohet, i shërben njerëzve dhe rezultatet në mandate dhe vota janë shumë të mira. Do të fillojmë punën për të fituar zgjedhjet lokale të vitit 2027”, tha Klosi.
Lini një Përgjigje